Mannifeste d'êlection

Né v'chîn eune vèrsion Jèrriaise dé man mannifeste d'êlection:


J'crai qu'nou dait balanchi un envithonnement sain, eune forte êcononmie, et d'l'opporteunité ouèrte tréjous à tous. Tout l'monde, qu'i' d'meuthent en Ville ou à la campangne méthitent d'la qualité d'lus vie.

L'Envithonnement et la pliann'nie

Jé d'vons protégi not' campangne tout en amendant l'envithonnement d'not' Ville. Nou-s'étha à s'en d'menter d'la qualité d'l'air villais. Des boulants êlectriques aîgu'thont dans la rêsolution d'chu problième et ché s'sa d'înstâller assez d'parqu'thies à chèrgéthie hors-c'mîn à seule fîn dé n'pon engaûmer les rues.

La grandeu d'la populâtion dévthait êt' prédîthabl'ye à seule fîn d'pouver plianner êffectivement, souôt'nabliément et justément: pouor lé louogeais, l's êcoles, lé transport, la santé, l'run en pliein air, et d'aut's èrssources et sèrvices.

J'consommons achteu trop d'êlectricité d'èrssources nucléaithes au run d'pouvièrs èrnouvabl'yes coumme les cheins solaithe et d'mathées. J'm'oppose ès dêv'loppements nucléaithes sus la côte vaîthinne.

L'êcononmie

À seule fîn d'asseûther l's îndustries d'finnances, dé tourisme et d'agritchultuthe et d'êcalopper des neuves cliôsées en divèrsifiant not' êcononmie, il est d'mêtchi d'garanti la fiabilité et la vâriêté d'lians rêdgulièrs dé transport: en travaillant acanté la Grand' Tèrre à seule fîn d'faithe la promotion du conmèrce, et en mithant étout Dgèrnésy, lé Rouoyaume Unni, la Brétangne et l'tou du monde.

Il est d'mêtchi d'adapter not' système dé taxe. Châque îndustrie dait payi sa juste châre, qué l'propriêtaithe du dêmnîn sait d'ichîn ou d'hors pays.

Il est d'mêtchi d'favoriser la craîssance dé p'tits dêmnîns d'ichîn en des pus grands tch'en gângnent, auve des projets à pousse-tchu pouor encouothagi les stèrtéthies d'dêmnîns.

L'adminnistrâtion Pârouaîssiale

J'ai prêchi d'pis un long but en faveu d'un corps êlu modèrnîsé, auve un système comprannabl'ye et cliai d'êlection d'membres, tchi pouôrra enfachi les calenges qu'la Pâraisse rencontrétha à l'av'nîn. Eune nouvelle louai définnitha les pouvièrs d'chu corps meunicipa renforchi. Auve lé pouver d'pâsser d's ordres auve la forche dé louai, un pouver d'lédgi par l's Êtats à Saint Hélyi, les r'présentants meunicipaux êlus pouôrront mett' à l'oeuvre les décisions coumme il' espéthent, les résidents et conmèrçants. Les Minnistres dévthaient approuver la stratégie et travailli constructivement acanté la Pâraisse, quandi qu'les Députés dévthaient souôt'nîn la capabilité d'la Pâraisse d'accomplyi êffectivement les décisions d'routinne.

Transport

Nou dévthait pouver marchi et pédaler par nos c'mîns en seûth'té; ch'est d'graie en priorité les routes seûth'tabl'yes ès êcoles. Un sèrvice dé beusse villais dévthait lier les parqu'thies, les marchièrs, les sèrvices dé santé, et les vaîthinnés. Nou-s'a approuvé du dêv'loppement dé d'meuthes dé densité sans assez d'parqu'thie; des parqu'thies l'tou d'la Ville dévaient êt' pliannées à seule fîn d'offri eune balanche dé parqu'thie ès résidents et travailleurs et d'pus vèrts quémîns auve pus d'bouais, d'trottouaithes dé laîze, d'arrêts d'beusse, dé c'mîns à bike, et d'runs à jouer.

Jèrri dans l'monde

L'identité întèrnâtionnale dé Jèrri a 'té à s'êcalopper et êvolueûtha acouo sans tcheindre compte des r'lâtions du Rouoyaume Unni d'auve l'Unnion Ûropéenne. Not' lian auve lé Rouoyaume Unni, fondé sus l'respé et l'avantage mutuel, dévthait êt' amendé par eune èrprésentâtion haûchie dans l'Commonwealth, des r'lâtions conmèrciales autonomes lé tou du monde, d'l'aîgue mithée à l'êtrangi, et l'èrconnaîssance d'l'identité du gouvèrnément d'sé d'Jèrri.

À seule fîn d'faithe entrer en vidgeu les louais pus êffectivement, nou dévthait s'accorder auve la Couronne qu'les louais d'Jèrri tchi n'sont pon contestées saient assentées par l'Lieut'nant-Gouvèrneux.

Êducâtion

L'êducâtion est au tchoeu d'la c'meunauté, mais dait s'mathier auve l'êconomie d'laîze. Nou dévthait faithe sèrvi les facilités scolaithes pouor couoyi l'pus à seule fîn d'sèrvi toute la c'meunauté. L'èrorgannîsâtion minnistéthielle a sparti l'êducâtion d'auve la tchultuthe; tout coumme l'héthitage et l's arts dévthaient êt' au tchoeu d'l'apprendrie pouor souôt'nîn l'êcalopp'thie d'nos îndustries graierêsses.